Diariu d'un Repunante
Cuando-y das a un repunante un blogue...

Quiero alendar la to esencia tumbada na mio cama sintiendo l'aumentu de la to presión sanguinea que tou ser de cadarma bioquímica puede algamar. Porque esi ye'l mio cultu a quien pudiere ser una virxe, o una puta, pagana. El llume qu'anubre dambos cuerpos nuna habitación cola lluz necesario pa facer de nós un amestáo de placer y sangre bombiáo so la escura piel que yo diba tornar blanca a base de llamber los tos pecaminosos rastros de vergoña y esmenar el mio frente fálicu en ti. Y mirándote a los güeyos les úniques pallabres que necesito, son les que l'aire que moldien les tos cuerdes bocales de mou primitivu pero h.odidamente sutil. Satisfaición. Perfeición gutural.

Y nel maxín lleo'l to contornu cola mio llingua con ciertu gustu, esperando hasta que seya más visible la to escitación énte dalgo que va asoceder per contautu d'un momentu a otru. La música caltién dafechu'l compás en que mos movemos nesta composición progresiva que sigue un continuum hestóricu indescifrable y imposible trescribir, pa los que solo entienden la masturbación xusta de los corderinos de Dios. Han morrer. Pero yo toi agarráu nel meyor llugar qu'esiste, demientres tas sometía a la gravedá que produz la mio exa celeste pa facer que tolos misterios l'océanu ya l'universu queden ensin dubia.

Dexemos la mente vacía de tou posu relixón, moral coleutiva, competencia emocional, que despaezan. Y nel momentu glayes que roble dientro de ti la mio firma sentimos que pasáu y futuru son unu, que too lo que vive la xente entra a ser parte de les nueses esperiencies, formando otru esllabón d'una cadena perfeuta de socesos aparentemente irrellacionaos que mos lleven per esti camín dignu del faláu a Menecéu, onde caciplamos nun vamos heredar esti planeta, nin vamos vivir 100 años, nin vamos ver París y Ponga, pero entainamos como dioses pente humanos.

Too eso sentimos nel intre que dura la contraición postrer. Darréu, silenciu. Namái quiero'l to aliendu na mio cara. Nel pescuezu llentu. Sábanes llentes.

Entós sí, aceuto que mos llegue la muerte, envede'l suañu

Acabo facer un xestu. Apurrí la mano y apagué la televisión. ¿Porqué? Porque soi ún de la milenta espeutadores afeutáu pola emisión de mierda llíquido qu'arrolla dende cuantayá nos canales. Entama Gran Hermanu ("Gran Hermano" o "Big Brother" en xiriga guiri).

Dende yá, vamos ser víctimes de la saturación d'estos programes a toes hores, en tou contestu, en cualesquier momentu ayuri u teamos. La mierda llíquido arrolla peles boques d'esta xente analfabeto, que caciplen de rexistru xugar pa optar por ser como eses zorres y putes (ye un fechu) de tou programa.

Atristayo dafechu al columbrar malapenes colo que nun pudi arricar de los mios güeyos y conduutu biliar, que tou personaxe despreciatible pue salir pela televisión. Nun tienes de tener nada especial, nin siquiera ganalo, nin puxar per ello. Puedes salir agora, puen llamate, puen facelo y que los tos suaños seyan una puta realidá vía sodomita...solo por glayar más qu'otru o por insultar, ya nun mentamos el folgar.

Esmolecemos entós cuando les noticies de que'l 53% la xente adulto (+18 años) nun llee un llibru (nin coses con fueyes). Y la metada lo que fai ye lleer best sellers de calidá inversamente proporcional a lo xabaz de la so tirada comercial. Vemos axorizáos que ye la metá la media européa, y asina, cada vuelta asemeyamonos dafechu a los protagonistes de les series pa la mocedá española...El cani de bon coral, el malu de pega maltratáu pola vida, la curiosina víctima d'un mundiu machista atrapada na rede de prostitución infantil, la profesora que tien una gayola con un escolín, el collaciu retarded..."Twilight in Vayekas"

Pémeque notástislo y nun soi l'únicu, o pue que seya un produutu la falta hores de sueñu, la falta contautu cola realidá acullá los llibros o la sidra que quixere beber cuando too va mal pa tastiar el paraísu. Notástislo, de xuru, que'l consumu Prozium algama llendes increyibles anguaño.

Sí...notástislo como yo al topame col collaciu mentáu dos entráes enantes nel blogue...sí, notastislo al ver acrítico a la xente en tolos campos...sí, notástislo al sentir les sos miráes por nun entrar en corral...sí, notástislo al lleer los sos sms o esnalar pel facebook o tuenti. H.oder, tamos notándolo bien.

La sesta nueche de setiembre col arma cargáu, porque quiciabes, no que queda de nueche, acabe prendiendo la televisión y deba apertar el gatillu na mio tiesta por llexítima defensa pa cola oligofrenia.

Emborríñase la nueche d'esti sábadu cola serenidá que mos envuelve viendo la tempestá que mos va sorprender ensin sabelo. Abro la ventana de mio casa y nun se siente res, dacuando una puerta que se zarra o un coche lloñe. Nun hai xente. Namái delles persones cualos zombies Non-Muertos, esnidiando pente'l llume tenebrosu les faroles ya la escuridá con esi grau de pelligru amenorgáu pola falsa sensación de securidá l'estáu de bienestar.

Otru escurecer más n'Asturies.

Pasiaron peles cais vieyos y rapacinos que nun tán nesti mundiu. Mozos gayoleros acuriosábense pa ser atrautivos a les femes d'anguaño, tan fermoses como repunantes.

La folixa.

Pa mio nun esiste la folixa demientres esista lo demás.

Los llobos asturianos deprendimos nun creyer na nueche zarráo. Nun confiamos nel silenciu nin nes nueses llendes. Pero yo soi un llobu pequeñu, col dentame cuasi inocente sangre. Qué voi dicir.

La nueche ye'l rixu lo ausente, esi momentu que nun aprovechemos o un xestu torga, igual son pallabres diches en momentos equivocáos ya fuera tiempu. Llárimes que nun tuvieran porque ser. Miráes que debieran tocase, pero nun lo fixeron y solo mos queda esa lluz allonxada na escuridá'l cielu prietu.

De nueche nun se pue finxir, nun hai dubies, lo que ye, nun ye; y lo que nun ye, muerde.

Setiembre entama como un mes abondu raru, como suel asoceder davezu que tamién ye verdá, pero non porque seya raru en sigo mesmu, sinón más bien pol so significáu coleutivu. En setiembre too torna a la normalidá, ye la primavera l’iviernu, pero vamos dexar los símiles poéticos pa enfotanos en daqué más propiu d’esti blogue.

Digo que ye l’entamu munches coses, que como ayeri, recuérdenme que la descomposición del carne humano, ye irremediable. ¿Por qué? De la que volvía pa casa de tratar con funcionarios, ayeri y güei, atopé a ún d’esos collacios qu’anguaño fueron amigos de folixa d’ún pero qu’un día, de sópitu, desapaecieron pa tresformase en poco más que nada, namái daquién a quien dicir “Hola”, cuando nun hai igua posible y, darréu, “Adiós”.

Cuidái agora, vamos dedicá-y un momentu a esa pallabra. Sí, vamos pensar nella; “Adiós”. Baxái la lluz y ponéi música, alta como pa que nadie más la sienta pero abonda pa nun dexar que mos pervierta’l ruíu ayenu a nós nel intre. Entós, zarrái los güeyos y pronunciaila mui lento, enfatizando enforma, y desaxeradamente los fonemes. Adulces, dái la emoción que más vos pete [“in crescendo”], lo que sintáis al dicilo. Decataivos, va solo:

“Adiós”

Pero nun vos animéis muncho, sinón, la pallabra pervierte y yá nun significa res.

Ye’l meyor frutu que pue xorrecer de la vibración les cuerdes bocales d’una persona, magar qu’anguaño tea vulgarizada pol so usu desorbitáu y descontestualizáu.

Depués de pasar per esi orgasmu llingüísticu, había que morrer, porque too decaye. Como la amistá, hasta qu’adeprendes que nella, solo hai dos tipos de persones qu’engloben dafechu tola xente. Los que “Importen” ya los que “Non-Importen”. Asina morrió’l rixu de mio por tener amigos, por ser meyor persona, por salvar a la masa de la medrana coleutiva. Yá nun yera’l mesmu, la socialización d’anguaño fexo presa d’él. Depués de falar y dicí-y “Hola”, dixi, “Adiós”, súpome a poco, nun llegó al nivel de prestor d’otres vegáes, too seya dicho, poro pa tastialo meyor, encartiábame solmená-y con terneza un testarazu secu nes ñaples pa depués alicá-y delles partes vitales del cuerpu reiteradamente col mio playeru diseñáu táuticamente per un trabayador infantil en China pa esti llabor. Esto féxome pensar nesi enfotu xabaz que mos aprende a sonrir amosando esi consentimientu implícitu esplícitamente énte cualesquier situación u mos somorgan anguaño p’aprende-yos a les nueves xeneraciones, a los fíos ya les fíes de nueso, que nun hai res polo que tengamos que cuidar d’horror y non resignase.

De xemes a cuando, algámenlo, pero nun tien misteriu si te repiten davezu que seyas un “Bon ciudadanu”. Emitiendo ensin xacíu lo que tienes de ver, polo que tienes que naguar, de lo que tienes de falar, lo que tienes de consumir ya les hestories que te presta sentir, al empar que t’encadarmen  el maxín cola semeya l’estereotipu baleru de turnu. Féxolo ensin decatase d’ello. Como aquél que me dixo que nun fumara porque ye malo demientres merca tabacu nuna de les millones de tiendes puestes pol estáu y ponse a fumar nun llugar nel que ta torgáo al empar qu’una muyer con sobropesu glaya enraxonada pola so mala conducta. Si se decatare de toles formes nes que puede morrer d’obsesidá, veríase a sigo mesmu como un “cadabre Maxi Size”.

Nun m’abulta doble moral porque nun tán viéndolo.

Que ye peor.

Facer que la xente nun nome les coses pel so nome, nun vaya ser que nun seyamos políticamente correutos, ofendamos a daquién nel procesu de “Alianza de Civilizaciones” y terminemos a hosties. Poro necesitamos que mos empobinen pel “bon camín”, esa ópera na que somos los “castratti” potenciales, queramos o non.

Aguanté a la funcionaria de turnu a la que paecía debé-y daqué de lo que nun m’alcordaba; Tamién caltuvi la compostura cuando, ún d’esos amigos de los que falo, párame pela cai pa cuntame la so vida, lo que ye d’él pa dempués, entrugame polo que ye de mio, anque a dambos mos importe una mierda.

Y sí, algamelo ensin clavá-y a naide un bic cristal na palma la mano y retorce-yla arrémente pa que zinque’l picu dexándo-y pernidio lo que ye la vida los coyones y que nun aceuto la gandaya, concentrando los malos momentos nel so escafoides; algamélo tamién cuando nun-y devolví lo que-y debiera cola mano abierta pa golpiar hasta que se tresformase nuna masa amorfa y llenta en suelu pa a la fin cuspiar cola sonrisa boba de realización personal énte la mirada axorizada, medranosa, d’horror, envidia y rixu carnal de la xente que tuviere mirando.

Somos de carne, somos carne. Nun tien xacíu lo que toos nomen como “Belleza interior”. Eso ye mierda pa encumar les carencies y defeutos, tresformales en virtudes santes oxetivu pa les persones de bien. Eses persones que te dicen que tienes de salir de casa a conocer xente, a ser posible una moza cola que apaciguar y amar; amigos colos que salir a ver pela TV los bares a sonormales pegándo-y patáes a un balón y cobrando millones; Participar nes seutes que piden el to votu dos meses enantes de les eleiciones que tienen al so cabezaleru como ídolu en llugar de cultu.

A la fin, l’índiz de derrotes y victories ye abondu estremáu, arriendes qu’entá sigo asina.

Sí, soi capaz d'algamar l'estilu los poetes desaniciáos pola inorancia humana ya desendolcar el mio conceutu bonal pa colos suaños de los demás de talu mou que tean agospiáos na mio burbuya de proteición. Arriendes de xugar cola más bayurosa les violencies gadaña en mano, que nin la Cadarma burbuse res, somorguir l'ideal del maxín humanu na peor ya más turbia realidá faciendo lo que seya al mio antoxu.

Puta hostia, puedo ser hasta un babayu bordeline supersticiosu ya español o ser l'ideal ástur de reencarnación de Taranus o Beleño. Por embargu, ¿quién yes tu pa pidime nada? Solo dalguien qu'afonda nel misteriu que ye'l rixu de mio por conocete. Qu'ambure esperanza ya medrana per casi igual. Yo tengo cuasi ventidos años según la constelación de Leo, soi inmortal. Tu tienes cuasi venti ún cantáos pol Coru la Güestia, venceyada a avieyar col tiempu, glayando qu'esnala de les tos manes ensin que faigas nada.

Yá, soi mui superior, poro nun sé, porque'l que tien la sensación de que'l tiempo-y afuxó, soi yo.

H.oder, pidi que beba la puta cerveza namái salga de la to boca al empar que miro dientro los tos güeyos, cuasi tan vacios como los de mio, demientres uso dambes manes pa dexate nidio cuan pervertíu puedo llegar a ser con xente mirando.

Güeyos negros.

Dilatáos per culpa de tolo que bebisti ya la dubia d'un cuerpu estroxenáu qu'entra en primavera como Les Asturies. Y so l'alcohol en celebru, la muria que guardaba'l recuerdu'l pasáu y presente, ensin futuru dalgún, porque nun lu tienes. Tampoco tienes control sobro les aiciones del to cuerpu.

Yes una muyer.

Les muyeres lloren.

Nun me gusta la xente que llora. Nun me gusta la xente que-y presta maquillase llorando, foines. Termino enantes si digo que nun me gusta la xente. Pero tu sabes llorar. Anubrir los tos rasgos de llárimes produz una esencia tráxica qu'endagora me pon más violentu y receutivu. Poro me gustes. Yo, contemplo una obra d'arte ensin muséu cuyu destín ye'l suelu moyáo n'hora punta d'un retrete públicu de xente enfiláo.

Quién va aceutar nel so círculu íntimu d'amistaes cercanes a dos seres tan despreciatibles como nós; solos, suicidas y, nel intre, borrachos. De xuru, naide que mereza la pena. Nin nel norte, nin nel sur, nin desiertu l'oriente. Quiero afuxir pela mar occidental y nun voi tornar a corral coles oveyines cuerdes, racionales, beates.

De toes maneres, duermes ya escaeces

Tan solo l'actu d'escribir yá ye daqué que m'enllena per dientro faciendo que toles coses negres que dacuando siento movese, apurran los fluyíos y el sangre necesario pa vivir a los muérganos encargáos d'ello, un tiempu polo menos. Y, tamien, soi consciente de que nun escribo bien, pero qué coño más da si yes puxarra, puta gandaya.

El maxín humanu morrió y anguaño glaya como un gochu xabaz feríu de muerte, mediu degüeyáu, afogándose nun charcu sangre propio. Somos los fíos bordeline que ven lo políticamente correuto como l'entamu y la fin del arte, obra y gracia divina. Lo fato ye l'estandar obligáo, y si non, mirái les páxines de redes sociales y el so desesperanzador mensaxe. Les coses importantes son abondo difíciles de facer y conlleven un riesgu pergrande. "A min dame sidrina, castañes y una cámara de fotos qu'atestigüen dalgo; puedo llendar los mios actos a espresiones pseudo-artístiques controláes. El guetu.

¿Cómo ye posible aceutar que naide tien el drechu de ferir la sensibilidá ayena diciendo les coses como son? Entós, cuida de pensar en coses, non, meyor, cuida de pensar, que puedes mancar a dalguien nel trescursu de la construición de la cadarma básica del pensamientu críticu. Y asina, too va dir a peor. Talamente como'l episodiu de los Simpson en que Bart lleía'l pensamientu de la xente:

"Solo bon pensamientu, solo bon pensamientu."

¿Qué foi del arte'l riesgu y la improvisación? Tornar al renacimientu'l pensamientu ye necesario. Camentar sobro la esistencia de nós y enfotase na esperiencia ensin intermediariu como elementu caberu. Desaniciar la madrana y les rutines polos fechos. ¿Qué ye eso de que'l pensamientu reaicionariu y fascista campe llibre peles cais pidiendo respetu como dalgo normal, ensin mieu, que Tini xinte tortiella tolos dies en plena crisis, qu'insulten a corrientes filosófiques y humanistes los prepúberes, idólatras enfiláos, a partir los vienres falando de valores y política de tala forma qu'avergoñaríen d'ellos anguaño, tanto'l sr. XesuCristu o el sr. De La Serna? Esi ye'l camín, que mos digan lo qu'hai que comer p'adelgazar ente hores y ser un modelu cuasi divín con tendencies bulímiques; lo qu'hai que beber pa molar colos amigos; lo que tienes que vistir pa ser reconocíu nuna tribu urbana, y, coime, lo que non pa nun ser agresivu; como tienes de reprimir los tos impulsos xabaces de masturbación o sexu desacomplexáu, probando toles combinaciones habides y por haber. Cada gota cunta nesta mierda mundiu que mos venden con posiblidaes de triunfu y xusticia "deus ex machina".

Quiciabes, dalgún de vós tenga la mesma revelación que William Foster tuvo en so día, nesi casu, que contáute conmigo.

Ten los coyones de xubir al pisu más altu'l to edificiu y saltar con una sonrisa pensando nos meyores momentos de la to vida sabiendo que naide ye quien nel primer saltu. Alcuérdate de cuando xugabes en pueblu, per Salas, en Buscabreru, pente esos montes, moyándote col orbayu d'antaño enantes de tener conocencia de la muerte. O la primer vez que-y llambisti la llingua a una muyer. La primer vez que-y llambisti'l coñu cola intención de llubricar la zona pa lo que vieno darréu, anque nun fuera una maravía. Decidi que nun vas caltener la violencia enfocada que rescampla nel orgullu de que te falen creyéndose la parte más importante de los fíos qu'integren la nación d'Onán. Aullar dende que veas la lluna, hasta que salga'l sol como un llobu xabaz ensin esmolecer pol que dirán les oveyines del to edificiu. Mañana igual-yos peta a ellos.

Dedíca-y el 100% de la to atención a Wagner nel intre qu'entame un nuevu día. Nun importa lo lloñe que teas y lo que tengas que caminar. Llevar la puta máscara que quixeres. Retar a duelu a muerte con calláos oxidáos a cualesquier que fale d'imposición o de que ye tan asturianu que nun reconoz lo más importante de la tierra. Nun sentir programes de xente pagao polos partíos. Nun pensar nel noxu que dan los que solo quieren figurar cuando la batalla ta ganada.

Díxome Repunante que col tiempu, vería resultáos.

Guiar la boca escontra'l mio puñu, pié nel so defeutu, de la prósima persona que solo quiera h.oder. Morrer per dientro. Un poco cada día, hasta que yá nun quede nada. Lo importante ye l'equilibriu. Darréu, ver les coraes de les persones. Ameyorar les espresiones faciales. Caltener el conceutu d'amor. Caltener el conceutu de destrucción. Prometer qu'enxamás vas dexar escapar a quien, por ironies del destín, pudisti tener y anguaño nun esiste. Vivir el momentu. Y depués. Ser sutíl. Ser montesín.

Caltener la postura propia de nun siguir a naide que nun seya yo. Desendolcar el mio estilu propiu magar que nun seya civilizáu, políticamente correutu, comprensible o comprensivu, amoralmente duru. Pue dase la situación de que nun te guste nin te preste que seya tan pueril y obscenu. Pue que seyas xentecaya. Una puta de les más barates. O igual quiero tenete cerca siempre. Igual me gustes. Soi incoherente.

Entrada dedicada a tola xente que fexo too lo que pudo y más de lo qu'albidraba pola llingua en maxisteriu. Nun se quienes son.

Siento'l instuntu depredador nes coráes afuxendo por salir a traviés del esternón. Paez cuasi imposible facer que nun se dea esta situación na dómina que toi viviendo. Ye como cuando tas viendo la televisión a les 00:30 un domingu y echen una peli que quies ver, y nun ties sueñu. Depués de tar avezáu los vienres y los sábados a relaxar el mio cuerpu y el mio maxín; d'entrar en mou relax; de desconeutar del mundiu y de la xente; ver ñubes; lleer llibros pela nueche enantes de durmir...vuelve a salir el Sol; los páxaros canten; el ruíu'l tráficu y les obres d'u mio casa; El gorgutar afogáu de la xente na cai; la sensación de dicir "Hola" otra vuelta...nun me gusta. Soi más de dicir "Adiós". Despidime d'esa xente. Préstame más ver la lluna nel cielu envede'l sol demientres falo de coses, en mio paecer, trescendeltales, que de que m'arroye'l colacao (llámolo colacáo, pero ye nesquick) pel cazu y manche la ropa recién puesto, onde se note enforma la mancha y les migues de les galletes cuyu cuerpu nun ye favoratible a qu'entren na boca ensin la posibilidá de peacer Fartini depués d'un banquete medieval. Pémeque, al contrariu que Fartini, como porque ye necesario, nun porque quiera destruyir les reserves d'alimentos del tercer mundiu y Les Asturies. Por eso, a les 6.30 a.m. necesito segregar endorfines recordándo-y a Dios cualu ye'l mio nome, porque yo acuérdome del d'él, amestáu con milenta axetivos políticamente incorreutos de finalidá escatolóxica.

Pongo'l mazcaritu pa salir a la cai. Pel camín al mio destín, atópome con delles persones del sexu opuestu, y non, (que nun se preocupen abondo pola so imaxe como pa paecer maniquies de cualesquier tienda de putes d'altu standing de la burguesía snob uvieína), que faen que m'imaxine los momentos más agradables de la mañana. Nun quiero saber el so nome, me la peta, nun quiero saber cuala ye la so vida nin lo felices y vácuos que son. Lo qu'importa ye que mos fadríamos pasar un bon ratu. De xuru, adeprender daqué l'ún del otru. Folgar xabazmente. Esta sensación multiplícase cuando veo dalguna muyer mayor que yo, qu'anque nun sepa porqué, atráe la mio mirada, y más, pa escontra ella. Préstame siguila colos güeyos, imaxinar coses y hestories, imaxinar un golor; el de so, envede a eses moces enfermes, adoctrináes como zorres en busca d'un fíu de la estaya social nomada enantes. L'efeutu Cata.

Cuerre muncho'l BMW.

Al volver a la corripa nauseabunda, puerca, vulgar y enfermiza onde salvo'l mundiu col mio trabayu en base a una mentira que yá nun s'enfoten en tapecer, vuelvo a sentir lo mesmo qu'al entamu de la mañana...y nestos casos, ser un cinéfilu ensin vergoña ayuda abondo al mio instintu caberu, dándo-y fueu al edificiu, dexando entrar el fumu pa qu'esnalaren fuera y -yos invadiera una falsa sensación de seguridá que nel intre-yos fadría ver que nun ye asina, cayáo en mano. Sonria na cara. Nun me daría más que la ropa tuviere mancháo d'otres sustancies estremáes del colacáo (qu'en verdá sigue siendo nesquick) pero igualemente viscoses y espeses, sucies. Escitantes como si tuvieren el poder de xenerar nel mio sistema nerviosu abondos péptidos opioides.

La xente mírame rir, y marmullen intentanto atalantar el porqué de la mio risa descontestualizada.

Solo Repunante camenta'l porqué.